საქართველოს დამოუკიდებლობის დღეს, 26 მაისს,  ტურიზმის ეროვნული ადმინისტრაცია თელავსა და ზუგდიდში აღნიშნავს.   ტურიზმის ეროვნული ადმინისტრაცია თელაველებსა და ქალაქის სტუმრებს მრავალფეროვან პროგრამას სთავაზობს. ბოლო მოსამზადებელ სამუშაოებს ადგილზე გაეცნო ტურიზმის ეროვნული ადმინისტრაციის ხელმძღვანელი მაია ომიაძე კახეთის რეგიონში სახელმწიფო რწმუნებულთან გიორგი ალადაშვილთან ერთად.

„ ტურიზმის ეროვნული ადმინისტრაცია საქართველოს დამოუკიდებლობის დღეს ღონისძიებებს თელავსა და ზუგდიდში მასპინძლობს. ჩვენ ახლა თელავში ვიმყოფებით, სადაც ხვალ, 26 მაისს, ღონისძიება გაიმართება. ერეკლე მეფის სახლ-მუზეუმის მიმდებარე ტერიტორიაზე სტუმრებს დახვდებათ  გასართობი ზონები, იქნება გასტრონომიული კუთხე,  მოეწყობა ბავშვთა გასართობი სივრცე. ველოდებით ბევრ სტუმარს დღის 2 საათიდან“,-განაცხადა მაია ომიაძემ.

26 მაისს, თელავში, 14:00 საათზე,  ერეკლე მეფის სახლ-მუზეუმის მიმდებარე ტერიტორიაზე გასტრონომიული ზონა მოეწყობა, გაიმართება ცნობილი შეფ-მზარეულების მიშა ავსაჯანიშვილისა და რუსო დაუშვილის მასტერკლასები.  მოეწყობა კულინარიული კონკურსები,  კერძებისა და ღვინის დეგუსტაცია.

ღონისძიების ფარგლებში სამეწარმეო სივრცეში ადგილობრივები ქალაქის სტუმრებს პროდუქტებს შესთავაზებენ.  ღონისძიების ფარგლებში მოეწყობა სპეციალური ინსტალაციები, წარმოდგენილი იქნება საქართველოს რუკა, რეგიონების ღვინისა და სამზარეულოს შესახებ,  მოეწყობა საბავშვო გასართობი სივრცე, სადაც ბავშვებს საშუალება ექნებათ სხვადასხვა შეჯიბრში მიიღონ მონაწილეობა.

დამოუკიდებლობის დღესთან დაკავშირებით ერეკლე მეფის სახლ-მუზეუმის მიმდებარე ტერიტორია თემატურად გაფორმდება, გამოიფინება საქართველოს დროშები.

საღამოს 17:10 საათზე,  საქართველოს დამოუკიდებლობის გამოცხადების ისტორიული დრო საზეიმოდ აღინიშნება. შესრულდება საქართველოს ჰიმნი. დამოუკიდებლობის დღის აღნიშვნა თელავში კონცერტით დასრულდება.