ტურიზმის ეროვნული ადმინისტრაციის ხელმძღვანელმა აზიის განვითარების ბანკის ორგანიზებით გამართულ ცენტრალური აზიის რეგიონული ეკონომიკური თანამშრომლობის ტურიზმის სამუშაო ჯგუფის შეხვედრაში მიიღო მონაწილეობა. ღონისძიების ფარგლებში განხილულ იქნება CAREC-ის პრიორიტეტული პროექტები, ტურიზმის სფეროში მიმდინარე მიმართულებები, ასევე მიღწეული შედეგები და დაგეგმილი აქტივობები.
„ცენტრალური აზიის რეგიონული ეკონომიკის თანამშრომლობის ტურიზმის სამუშაო ჯგუფის პირველი კომისიის სხდომა გიმართა. კოვიდ პანდემიის შემდეგ ეს იყო პირველი ფიზიკური შეხვედრა. ჩვენ გავუზიარეთ საქართველოს ტურიზმის აღდგენის დინამიკა, გავაცანით სტატისტიკა, დავსახეთ სამოქმედო გეგმები და ველოდებით ახალ პროექტებს, რომელსაც ერთობლივად განვახორციელებთ“,-აცხადებს ტურიზმის ეროვნული ადმინისტრაციის ხელმძღვანელი მაია ომიაძე.
ღონისძიების მიზანია კარეკის რეგიონში ტურიზმის გამოცოცხლება აბრეშუმის გზის წარმოჩენა და რეგიონული თანამშრომლობის ხელშეწყობა. მონაწილეებმა რეგიონში ტურიზმის მდგრადი განვითარების შესახებ ისაუბრეს და ახალი აქტივობები განიხილეს, როგორიცაა ინდიკატორების მონაცემთა ბაზა, ABEC-ის უსაფრთხოებისა და ჯანდაცვის პროტოკოლი.
„საქართველოს აქვს ტურიზმის დიდი პოტენციალი და ეს მნიშვნელოვანია არამარტო საქართველოსთვის და რეგიონისთვის, ასევე ცენტრალური აზიის ქვეყნებისთვის. ის რომ საქართველო მარტივად გამოვიდა ეკონომიკური კრიზისული პერიოდიდან ტურიზმის დამსახურებაა, ეს არამარტო საქართველოსთვისაა კარგი, ეს დიდ სტიმულს აძლევს რეგიონს და სხვა ქვეყნებს. ჩვენ ამ მიზნით ვართ საქართველოში, რომ გავიზიაროთ ეს გამოცდილება. საქართველო არაჩვეულებრივი ქვეყანაა, ტურიზმით, გარემოთი, ბუნებით, გასტრონომიით. ძალიან გვიხარია, რომ ხელს ვუწყობთ საქართველოს, რეგიონის ტურიზმის განვითარებას და თანამშრომლობას ცენტრალური აზიის ქვეყნებთან“,-აცხადებს ADB-ის ცენტრალური და დასავლეთ აზიის რეგიონის დეპარტამენტის გენერალური დირექტორის მოადგილე შაოჰონგ იანგი.
აზიის განვითარების ბანკის ორგანიზებით გამართული ცენტრალური აზიის რეგიონული ეკონომიკური თანამშრომლობის ტურიზმის სამუშაო ჯგუფის შეხვედრა ორი დღის განმავლობაში გაგრძელდება. კომისიის წევრები ხვალ თბილისის ღირსშესანიშნაობებს მოინახულებენ.