გერმანელთა ნაკვალევი სამხრეთ კავკასიაში

ჩვენს დროში მიგრაცია ყოველდღიურ და მასშტაბურ ფენომენს წარმოადგენს. ბოლო ათწლეულების განმავლობაში კავკასიის ქვეყნებიდან უამრავი ადამიანი წავიდა ევროპასა და მსოფლიოს სხვადასხვა ქვეყანაში. XIX საუკუნის დასაწყისში კი ყველაფერი პირიქით იყო: ევროპელები ჩამოდიოდნენ სამხრეთ კავკასიაში საცხოვრებლად და სამუშაოდ. ამ დროისათვის, დაპყრობითი ლაშქრობების შედეგად, რუსეთის იმპერიის საზღვრებმა თითქმის წინა კავკასიამდე გადმოიწია. აღნიშნულ პროცესს საფუძველი ჯერ კიდევ XVIII საუკუნეში, ეკატერინე დიდის (1729-1796) დროს ჩაეყარა. მისი ბრძანებით, არა მხოლოდ სამეცნიერო კვლევებს აწარმოებდნენ იმპერიის შორეულ რეგიონებში, არამედ ახლად დაპყრობილ ტერიტორიებზე უცხოელთა განსახლებასაც ახორციელებდნენ. 1762-64 წლების ეგრეთ წოდებული მოწვევის მანიფესტებით ჩამოყალიბდა მომავალი კოლონიზაციის სამართლებრივი ჩარჩო, ახალმოსახლეთა უფლებებითა და მოვალეობებით. ასე დაიწყო მიგრანტების – უმთავრესად გერმანელთა – დასახლება რუსეთის იმპერიაში.