საქართველოს ტურიზმის ეროვნულმა ადმინისტრაციამ  საუდის არაბეთში, ერ-რიადში  საქმიანი ტურიზმის  საერთაშორისო კონგრესში KBLT – Kingdom Business Luxury Travel Congress მიიღო მონაწილეობა. ღონისძიებაზე ადმინისტრაციის საკონვენციო და საგამოფენო ბიურო იყო წარდგენილი.

კონგრესის ფარგლებში, საკონვენციო და საგამოფენო ბიურომ B2B შეხვედრები გამართა სპარსეთის ყურის ქვეყნების 30-მდე ბიზნეს ღონისძიების პოტენციურ დამკვეთთან. შეხვედრებზე რეგიონის უმსხვილესი ტურისტული და ავიაკომპანიების წარმომადგენლები საქართველოს ბიზნეს ტურისტულ პოტენციალს გაეცნენ.

საერთაშორისო კონგრესზე ტურიზმის ეროვნული ადმინისტრაციის საკონვენციო და საგამოფენო ბიუროს წევრი კომპანიები მონაწილეობდნენ.

Kingdom Business Luxury Travel Congress (KBLT) რიგით მე-2 საერთაშორისო კონგრესს საუდის არაბეთიდან, არაბთა გაერთიანებული საამიროებიდან,  ომანიდან, ბაჰრეინიდან, ქუვეითიდან და კატარიდან 250-მდე დელეგატი ესწრებოდა.

KBLT ერთ-ერთი ყველაზე გავლენიანი პლატფორმაა ახლო აღმოსავლეთის ქვეყნებში, კონგრესის მიზანია ბიზნეს ტურისტული პროდუქტების მიმწოდებლები, ბიზნეს ტურიზმისა და სტუმართმოყვარეობის სფეროს პროფესიონალები შეთავაზებული პროდუქტების პოტენციურ მყიდველებს დაუკავშირდნენ.