საქართველოს ტურიზმის ეროვნულმა ადმინისტრაციამ ჩინეთში, შანხაიში, საერთაშორისო ტურისტულ გამოფენაში პირველად მიიღო მონაწილეობა. ITB China 2024-ზე ტურიზმის ეროვნულ ადმინისტრაციასთან ერთად აჭარის ტურიზმისა და კურორტების დეპარტამენტი, თბილისის მერია, სვანეთის, სამეგრელოსა და იმერეთის დანიშნულების ადგილის მართვის ორგანიზაციები იყო წარმოდგენილი.  გამოფენას საქართველოდან 10-მდე კერძო კომპანია დაესწრო.

„ტურიზმის ეროვნული ადმინისტრაცია მრავალი წელია მონაწილეობს ჩინეთში გამოფენა-ბაზრობებზე, თუმცა წელს  პირველად, შანხაიში, წარმოდგენილები ვართ ITB China 2024-ზე, ვფიქრობთ წარმატებული გამოფენა იქნება, აღსანიშნავია, რომ უვიზო მიმოსვლა და პირდაპირი ავიარეისები მნიშვნელოვნად ზრდის საქართველოს მიმართ ინტერესებს ჩინელი ტურისტების მხრიდან. ვფიქრობ საქართველოს დიდი პოტენციალი აქვს ჩინეთიდან ბევრი ტურისტი მოვიზიდოთ“,-აცხადებს „ტურიზმის ეროვნული ადმინისტრაციის ბრენდის განვითარების სამმართველოს უფროსი ანა კეკელია.

„საქართველოსა და ჩინეთს შორის უკვე მოქმედებს უვიზო რეჟიმი, რაც ნიშნავს, რომ აქტიურად შეგვიძლია ვიმუშაოთ ჩინეთის ბაზარზე, როგორც ტურისტული და ეკონომიკური თვალსაზრისით.  წელს საქართველო პირველად მონაწილეობს ITB China 2024-ზე, რომელიც უმსხვილესი გამოფენაა, სადაც მთელი მსოფლიოდან თავს იყრიან ტურისტული კომპანიები, ჩინეთში მოქმედი წამყვანი ტუროპერატორები. საქართველო ამ გამოფენაზე წარმოდგენილია ტურიზმის სექტორთან ერთად. ჩვენ აქტიურად ვხვდებით მედიის წარმომადგენლებს, ინფლუენსერებს, ასევე ტუროპერატორებს, რომლებიც მოამზადებენ პაკეტებს საქართველოს მოგზაურობისთვის, რაც ხელს შეუწყობს ჩვენს ქვეყანაში ვიზიტორების ზრდას“,- განაცხადა აჭარის ტურიზმის დეპარტამენტის თავმჯდომარემ თინათინ ზოიძემ.

„სამეგრელოს დანიშნულების ადგილის მართვის ორგანიზაცია გამოფენაზე, სამეგრელოთი დაინტერესებულ სტუმრებს აცნობს რეგიონის ტურისტულ პროდუქტებს. მოხარული ვარ, რომ ინტერესი დიდია, რასაც ასევე განაპირობებს უვიზო რეჟიმი. დარწმუნებული ვარ დიდი ტურისტული ნაკადების შემოყვანას შევძლებთ“,-განაცხადა სამეგრელოს დანიშნულების ადგილის მართვის ორგანიზაციის წარმომადგენელმა თეა საჯაიამ.

გამოფენაზე, საქართველოს სტენდს ITB-ის აღმასრულებელი დირექტორი ჩინეთის უმსხვილეს ტურისტულ კომპანიებთან ერთად გაეცნო. მარიო ტობიასმა საქართველოს წარმატება უსურვა და  განაცხადა, რომ ქვეყანას ტურისტების მოზდვის დიდი პოტენციალი აქვს.

„მოხარულები ვართ, რომ საქართველო ITB China 2024-ზე პირველად მონაწილეობს. საქართველო ITB Berlin-ის ძლიერი პარტნიორია, საქართველო იყო ჩვენი გამოფენის მასპინძელი ქვეყანა. საქართველოს შეუძლია ბევრი შესთავაზოს სტუმრებს, ეს არის უძველესი ისტორია, ულამაზესი ხედები, კერძები, კულტურა. ვფიქრობ ეს გამოფენა წარმატებული იქნება საქართველოსთვის“,-აცხადებს მარიო ტობიასი ITB Berlin-ის ჯგუფის აღმასრულებელი დირექტორი.

„საქართველო ჩინეთის კარგი მეგობარია, არასდროს ვყოფილვარ თქვენს ქვეყანაში, მაგრამ ბევრი მსმენია, საქართველოს ისტორიის, ტრადიციების, ღვინისა და კერძების შესახებ. ბევრ ჩინელ ტურისტს სურს ეწვიოს საქართველოს, მეც ვაპირებ ჩამოვიდე საქართველოში“,-განაცხადა მსოფლიო ტურიზმის ალიანსის თავმჯდომარის მოადგილემ ლიუ შიჯუნიმ.

ერთ-ერთ ყველაზე მასშტაბურ საერთაშორისო ტურისტულ გამოფენაზე, საქართველოს სტენდთან, დამთვალიერებლებს საშუალება ჰქონდათ გას

ცნობოდნენ საქართველოს ტურისტულ პროდუქტებსა და საიმიჯო ვიდეო რგოლებს.

გამოფენის ფარგლებში საქართველოს ტურიზმის სექტორის წარმომადგენლებმა შეხვედრები გამართეს პოტენციურ პარტნიორებთან. ტურიზმის ინდუსტრიის  წარმომადგენლებმა აღნიშნეს, რომ საქართველოსა და ჩინეთს შორის უვიზო მიმოსვლის დაწყება მნიშვნელოვნად გაამარტივებს ჩინეთიდან ტურისტული ნაკადების მოზიდვას.

„პირველად ვმონაწილეობთ ამ გამოფენაში და ჩვენთვის ძალიან მნიშვნელოვანია ITB China 2024-ზე წარდგენა, რადგან ბოლო პერიოდში, ჩვენს სასტუმროში, აქტიურად შეინიშნება ჩინეთიდან ტურისტული ნაკადები. ამას ხელს უწყობს უვიზო რეჟიმის გააქტიურება და ველოდებით უფრო მეტ ტურისტს ჩინეთიდან, რაც ქვეყანას ძალიან წაადგება“,-ამბობს სასტუმრო პულმანის წარმომადგენელი ანა ჩოხელი.

„ძალიან მნიშვნელოვანია საერთაშორისო ტურისტულ გამოფენებში მონაწილეობა, გამოვარჩევდი ITB Belin-სა და  ITB China-ს გამოფენებს. უკვე დაიწყო  უვიზო მიმოსვლა და პირდაპირი ფრენები სრულდება ურუმჩიდან თბილისკენ და როგორც ვიცი იგეგმება სიხშირეების ზრდა. რაც ძალიან მნიშვნელოვანია ჩვენი ტურისტული ბაზრისთვის. ჩინეთის მოსახლეობა მილიარდ ნახევარია და დიდი ტურისტული ბაზარია, ვცდილობთ მეტი კონტაქტი გვქონდეს და მეტი ურთიერთობა დავამყაროთ“,-აცხადებს კომპანია ვიესის დამფუძნებელი გერმანე ჭელიძე.

„დიდი მადლობა ტურიზმის ეროვნულ ადმინისტრაციას ამ შესაძლებლობისთვის, საქართველოსა და ჩინეთს შორის ურთიერთობები ძალიან მნიშვნელოვანია, მეტი ტურისტია საჭირო საქართველოში და ამ ქვეყანას ძალიან დიდი რესურსი აქვს. უვიზო რეჟიმი უმნიშვნელოვანესია და ჩვენ ტურიზმის ეროვნულ ადმინისტრაციასთან ერთად შევეცდებით ეს ურთიერთობები გავაღრმაოთ“,-განაცხადა ჯორჯიან ჰოლიდეის წარმომადგენელმა ლალი გიგაურმა.

„ჩინური ბაზარი ძალიან საინტერესოა და პოტენციურად მზარდია საქართველოსთვის. ეს გამოფენა ერთ-ერთ უმნიშვნელოვანესია, სადაც შეიძლება საქართველოს წარდგენა, სერვისებისა და პროდუქტების რეკლამირება, რასაც საქართველო სთავაზობს სტუმრებს. უვიზო მიმოსვლა კარგი შესაძლებლობაა ჩინელმა ტურისტებმა იმოგზაურონ საქართველოში. იმედი მაქვს ეს გამოფენა წარმატებული იქნება და ჩვენ დიდ ტურისტულ ნაკადებს მივიღებთ საქართველოში“,- ამბობს კავკასუს თრეველის წარმომადგენელი გვანცა რაზმაძე.

„ პირველად ვიღებთ მონაწილეობას ITB China 2024-ზე. პანდემიამდე აქტიურად ვთანამშრომლობდით ჩინეთის ბაზართან და გვსურს განახლდეს ეს ურთიერთობები და დაუბრუნდეს იმ ნიშნულს. საინტერესო შეხვედრები გვქონდა, იმედი გვაქვს ნელ-ნელა კიდევ უფრო გააქტიურდება თანამშრომლობა. ხელს გვიწყობს ის ფაქტი, რომ პირდაპირი ფრენები გვაქვს, ამოქმედდა უვიზო მიმოსვლა. იმედი გვაქვს წარმატებული გამოფენა გამოდგება“,-აცხადებს სასტუმრო ბილტმორის წარმომადგენელი ქეთევან რეხვიაშვილი.

„ჩინეთთან უვიზო მიმოსვლა ძალიან მნიშვნელოვანია, ეს გამოფენა ხელს შეუწყობს საქართველოს პოპულარიზაციას. მნიშვნელოვანია, რომ გაიზარდა ფრენების სიხშირე საქართველოსა და ჩინეთს შორის. ვფიქრობ ეს პლატფორმა დაგვეხმარება ტურისტების მოზიდვაში“,-განაცხადა ჯორჯიან დესთინეიშენ მენეჯმენტის წარმომადგენელმა ნინო ჭილაძემ.

„უვიზო მიმოსვლა მოტივაციას აძლევს ჩინელ ტურისტებს საქართველოს ეწვიონ, ბევრ ქვეყანაში სჭირდებათ ვიზა და ჩვენს შემთხვევაში ეს დიდი პლუსია. ასევე პირდაპირი ფრენები ურუმჩიდან, რომელიც ყოველდღე სრულდება ძალიან მნიშვნელოვანია, ეს ნიშნავს, რომ ჩინეთის ყველაზე შორი წერტილიდან საქართველო ტურისტი 8-9 საათშია, ესეც კარგი პირობაა საქართველოში მოვიზიდოთ ტურისტები ჩინეთიდან“,-განაცხადა ჯორჯიან ბასის წარმომადგენელმა შალვა ხუციშვილმა.

ტურიზმის ეროვნულმა ადმინისტრაციამ, შანხაის საერთაშორისო ტურისტული გამოფენის სტუმრებისთვის, ბრიტანული ელექტრონული მუსიკის პროექტის „Jungle“-ს კონცერტზე დასასწრებად ბილეთები გაათამაშა. კამპანია “სთარინგ ჯორჯიას” ფარგლებში, მსოფლიო ვარსკვლავების მონაწილეობით კონცერტები Black Sea Arena-ზე გაიმართება.

„ძალიან მოხარული ვარ რომ გავიმარჯვე და მოუთმენლად ველი საქართველოში გამგზავრებას და კონცერტზე  დასწრებას“,- აცხადებს გამოფენის მონაწილე და  გათამაშების გამარჯვებული რაია.

„ძალიან გამიხარდა, Jungle“-ს კონცერტზე დასასწრები ორი ბილეთი მოვიგე, საქართველოში ვაპირებ ჩამოსვლას და ადგილზე ამ კონცერტზე დასწრებას“,-განაცხადა გამოფენის მონაწილემ და  გათამაშების გამარჯვებულმა ჯულია შუმ.

შანხაის სამ დღიან ტურისტულ გამოფენაზე  80-ზე მეტი ქვეყნიდან 1600-ზე მეტი ორგანიზაცია და  კომპანია იყო წარმოდგენილი.