საქართველოს ტურიზმის ეროვნულმა ადმინისტრაციამ მოდის სფეროში გავლენიანი ჟურნალის ELLE-ს უნგრული რედაქციის წარმომადგენლებს უმასპინძლა.  პრესტური უნგრეთში საქართველოს საელჩოს ინიციატივით შედგა.

საერთაშორისო გამოცემის ჟურნალისტებმა თბილისის ტურისტული ადგილები მოინახულეს, გაეცნენ დედაქალაქის ისტორიულ უბნებს, კულტურას, მუზეუმებს, საგამოფენო სივრცეებს, ქართულ სამზარეულოსა და თანამედროვე მოდის ტრენდებს.

ELLE-ს უნგრული რედაქცია ქართული სტუმარმასპინძლობის, საქართველოს ტურისტული პოტენციალის, მოდისა და კულტურის შესახებ ვრცელ სტატიას ამზადებს, რასაც გამოცემის მკითხველები გაეცნობიან როგორც ELLE-ვებ-გვერდზე, ასევე სოციალურ ქსელებში.